Plantun de Prouvènço

Pèr coumpara dos planto d'encò nostre

Sparganium natans & Ononis spinosa subsp. antiquorum

Varaioun(-nadant)

Sparganium natans

Typhaceae Sparganiaceae

Autre noum : Sagno.

Noms en français : Petit rubanier, Rubanier nageant.

Descripcioun :
Aquéu varaioun, rare au nostre, trachis dins li lau de mountagno, en pleino aigo. Pòu tapa de gràndi surfàci. Li fueio soun estrecho e loungarudo. Se destrìo dóu varaioun-di-fueio-estrecho, Sparganium angustifolium emé la baso de si fueio gaire engueinanto e gaire gounflo. Coumpara emé lou varaioun-di-fueio-estrecho que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 0,1 à 1 m
Fueio : costo paralèlo
Tipe bioulougico : Idroufite
Cicle bioulougico : Planto renadivo

Gènre : Sparganium
Famiho : Typhaceae
Famiho classico : Sparganiaceae

Ordre : Poales

Coulour de la flour : Blanco
Petalo : ges
Ø (o loungour) enflourejado : 1 à 2 cm
Flourido : Estiéu

Sòu : Si
Autour basso e auto : 0 à 1900 m
Aparado : Noun
Juliet à avoust

Liò : Aigo - Lau
Estànci : Subaupen
Couroulougi : Bourealo
Ref. sc. : Sparganium natans L., 1753 (= Sparganium minimum Fr., 1846 )

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.